தமிழ்நாடு வீட்டுவசதி, மதுவிலக்கு மற்றும் ஆயத்தீர்வைத்துறை அமைச்சர் சு. முத்துசாமி, தமிழ் வளர்ச்சி மற்றும் செய்தித்துறை அமைச்சர் மு. பெ. சாமிநாதன் ஆகியோர் இணைந்து ஈரோடு மாவட்டம் சித்தோடு ஆவின் பால்பண்ணை வளாகத்தில் அமைக்கப்பட்டுள்ள பால்வளத்தந்தை ஐயா எஸ். கே. பரமசிவன் அவர்களின் முழு திருவுருவச் சிலையை நேரில் பார்வையிட்டு ஆய்வு மேற்கொண்டனர்.
பால் உற்பத்தி, பால் கூட்டுறவுச் சங்கங்கள் மற்றும் கிராமப்புற வளர்ச்சிக்காக பெரும் பங்களிப்பு செய்த பரமசிவன் அவர்களின் நினைவாக அமைக்கப்பட்ட சிலை, ஆவின் வளர்ச்சி வரலாற்றில் முக்கியக் குறியீடாக அமைந்துள்ளது. இதனை ஒட்டி, வளாகத்தின் பராமரிப்பு நிலை, சிலை அமைக்கப்பட்டுள்ள பகுதியின் மேம்பாட்டு பணிகள், வருகை தரும் பொதுமக்கள் பயன்பாட்டிற்கான வசதிகள் ஆகியவை குறித்து அமைச்சர்கள் விரிவாக ஆய்வு செய்தனர்.
இந்த ஆய்வின்போது ஈரோடு நாடாளுமன்ற உறுப்பினர் கே. இ. பிரகாஷ், ஈரோடு கிழக்கு சட்டமன்ற உறுப்பினர் வி. சி. சந்திரகுமார், நினைவகங்களின் இணை இயக்குநர் தமிழ்செல்வராஜன் உள்ளிட்ட பலரும் கலந்து கொண்டு அமைச்சர்களுக்கு தேவையான விளக்கங்களை வழங்கினர்.
பால்வளத்துறையில் பரமசிவன் அவர்கள் ஏற்படுத்திய மாற்றங்களை நினைவுகூரும் வகையில், சிலை அமைந்துள்ள பகுதியை பொதுமக்கள் வருகைக்கு ஏற்றவாறு மேலும் மேம்படுத்தும் பணிகள் விரைவில் முன்னெடுக்கப்படும் என அதிகாரிகள் தெரிவித்தனர்.
கருத்துகள் இல்லை:
கருத்துரையிடுக