திருப்பதி திருமலை தேவஸ்தானம் (TTD) வைகுண்ட ஏகாதசி 2026 விழாவை முன்னிட்டு பக்தர்களின் பெரும் திரளைக் கருத்தில் கொண்டு விரிவான தரிசன ஏற்பாடுகளை அறிவித்துள்ளது. வைகுண்ட ஏகாதசி தினத்தையும் சுற்றியுள்ள 10 நாட்களையும் பொருத்தவரை மொத்தம் 182 மணி நேர தரிசன நேரம் ஒதுக்கப்பட்டுள்ளது. இதில் 164 மணி நேரம் பொதுப் பக்தர்களுக்காக மட்டுமே ஒதுக்கப்பட்டுள்ளதும் குறிப்பிடத்தக்கது.
வைகுண்ட ஏகாதசி சிறப்பு தரிசனத்திற்கு இலவச டோக்கன்கள் வழங்குவதற்கான பதிவு நவம்பர் 27 முதல் டிசம்பர் 1 வரை நடைபெறும். இந்நாட்களில் பதிவு செய்தவர்களில் இருந்து டிசம்பர் 2ஆம் தேதி குலுக்கல் முறையில் (Dip System) தேர்வு செய்து டிக்கெட்டுகள் வழங்கப்படும். மொத்தம் 8 லட்சம் இலவச தரிசன டோக்கன்கள் இந்த 10 நாட்களுக்கு பக்தர்களுக்கு ஒதுக்கப்பட உள்ளன.
தேவஸ்தானம் வெளியிட்ட அட்டவணைப்படி, முதல் மூன்று நாட்கள் — டிசம்பர் 30, டிசம்பர் 31 மற்றும் ஜனவரி 1 — ஆன்லைன் இ-டிப் டோக்கன் வைத்திருக்கும் பக்தர்களுக்கு மட்டுமே பிரத்யேகமாக வைகுண்ட துவார வழியாக தரிசனம் அனுமதிக்கப்பட்டுள்ளது. பரிந்துரை, அர்ஜுன சேவை, VIP உள்ளிட்ட அனைத்து சிறப்பு அனுமதிப்பத்திரங்களும் இந்த மூன்று நாட்களில் ரத்து செய்யப்படுகின்றன. இது பொதுப் பக்தர்களுக்கு முன்னுரிமை வழங்க வேண்டுமென தமிழக முதலமைச்சர் தரப்பிலிருந்து வந்த அறிவுறுத்தலின் அடிப்படையில் மேற்கொள்ளப்படுவதாக தேவஸ்தான தலைவர் பி.ஆர். நாயுடு தெரிவித்துள்ளார்.
ஜனவரி 2 முதல் ஜனவரி 8 வரை பொதுப் பக்தர்களுக்கான வழக்கமான சர்வ தரிசனம் மீண்டும் தொடங்கும். இந்த காலகட்டத்தில் தினமும் 15,000 ரூ.300 சிறப்பு தரிசன டிக்கெட்டுகளும், 1,000 ஸ்ரீவானி அறக்கட்டளை இடைவேளை தரிசன டிக்கெட்டுகளும் ஆன்லைனில் வெளியிடப்படும். நேரில் வருகை தரும் பிரமுகர்களுக்கு மட்டும் பரிந்துரை தரிசனம் வழங்கப்படும்.
மேலும், திருமலை உள்ளூர்வாசிகளுக்காக ஜனவரி 6, 7 மற்றும் 8 ஆகிய நாட்களில் தினமும் 5,000 சர்வ தரிசன டோக்கன்கள் ஒதுக்கப்பட்டுள்ளன.
இந்த மொத்த ஏற்பாடுகளும் வைகுண்ட ஏகாதசி தரிசனத்தை மிகவும் தடையில்லாமல், பொதுப் பக்தர்களுக்கு அதிகளவு வசதியாக மாற்றும் விதமாக அமைகின்றன.
கருத்துகள் இல்லை:
கருத்துரையிடுக