பவானிசாகர் பகுதியில் ₹111.40 கோடி வளர்ச்சித் திட்டப் பணிகளை மாவட்ட ஆட்சியர் ஆய்வு!

ஈரோடு மாவட்டத்தில் ₹111.40 கோடி மதிப்பீட்டிலான வளர்ச்சித் திட்டப் பணிகளை மாவட்ட ஆட்சியர் ஆய்வு! ஈரோடு, ஜூலை 4, 2025: ஈரோடு மாவட்டம் முழுவதும் ₹111.40 கோடி மதிப்பீட்டில் நடைபெற்று வரும் பல்வேறு வளர்ச்சித் திட்டப் பணிகளை மாவட்ட ஆட்சித் தலைவர் திரு. ச. கந்தசாமி, இ.ஆ.ப., இன்று ஆய்வு செய்தார். பவானிசாகர் பேரூராட்சி, புஞ்சை புளியம்பட்டி நகராட்சி, பவானிசாகர், புங்கார் மற்றும் கொத்தமங்கலம் ஆகிய ஊராட்சிகளில் நடைபெற்று வரும் பணிகளை அவர் பார்வையிட்டார். பவானிசாகர் பேரூராட்சி அலுவலக ஆய்வு பவானிசாகர் பேரூராட்சி அலுவலகத்தில், அங்கு பராமரிக்கப்பட்டு வரும் பதிவேடுகள், பணியாளர்கள் விவரம், பேரூராட்சி மூலம் செயல்படுத்தப்படும் அரசின் திட்டங்கள், மற்றும் வரி வசூல் விவரம் குறித்து மாவட்ட ஆட்சியர் ஆய்வு மேற்கொண்டார். அம்ரூத் 2.0 திட்டப் பணிகள் ஆய்வு புஞ்சை புளியம்பட்டி நகராட்சி: அம்ரூத் 2.0 திட்டத்தின் கீழ் ₹52.07 கோடி மதிப்பீட்டில் நடைபெற்று வரும் குடிநீர் திட்ட மேம்பாட்டுப் பணிகளை மாவட்ட ஆட்சியர் பார்வையிட்டார். பணிகள் நிறைவடைந்த விவரம், திட்ட ஒப்பந்த காலம், மற்றும் இத்திட்டத்தின் மூலம் பயன்பெறும் மொத்த குடியிருப்புகள் குறித்தும் கேட்டறிந்தார். பவானிசாகர் பேரூராட்சி: அம்ரூத் 2.0 திட்டத்தின் கீழ் ₹12.16 கோடி மதிப்பீட்டில் பவானிசாகர் பேரூராட்சியின் குடிநீர் திட்டத்தை மேம்படுத்தும் பணிகளையும் அவர் ஆய்வு செய்தார்.

குழந்தைகள் மையம் மற்றும் இலங்கைத் தமிழர் முகாம் ஆய்வு தொடர்ந்து, பவானிசாகர் எல்.எம்.சி நகரில் செயல்பட்டு வரும் குழந்தைகள் மையத்திற்கு வருகை தந்த குழந்தைகள் எண்ணிக்கை, குழந்தைகளின் வயதுக்கு ஏற்ற எடை, உயரம், அவர்களுக்கு வழங்கப்படும் இணை உணவு, குழந்தைகளுக்கான விளையாட்டு உபகரணங்கள் மற்றும் பராமரிக்கப்படும் பதிவேடுகள் உள்ளிட்டவற்றை மாவட்ட ஆட்சியர் ஆய்வு செய்தார். மேலும், பவானிசாகர் இலங்கைத் தமிழர் மறுவாழ்வு முகாமில் ₹6.92 கோடி மதிப்பீட்டில் இலங்கைத் தமிழர்களுக்காகக் கட்டப்பட்டுள்ள வீடுகளையும் அவர் ஆய்வு செய்தார்.

புங்கார் ஊராட்சி மற்றும் கொத்தமங்கலம் ஆய்வு புங்கார் ஊராட்சி: தமிழ்நாடு மாநில ஊரக வாழ்வாதார இயக்கத்தின் சார்பில் ₹10.00 லட்சம் மதிப்பீட்டில் கட்டப்பட்டு வரும் மதிய உணவு அங்கன்வாடி கட்டிடப் பணிகளை பார்வையிட்டு ஆய்வு செய்தார். அப்பகுதியில் செயல்பட்டு வரும் மகளிர் குழுக்களின் விவரங்கள் மற்றும் அவர்கள் மேற்கொள்ளும் சுயதொழில் விவரங்கள் குறித்தும் கேட்டறிந்தார். கொத்தமங்கலம் ஊராட்சி, காராச்சிக்கொரை மேடு குக்கிராமம்: வனத்துறைக்குச் சொந்தமான நாற்றங்கால் பண்ணையில், பசுமை தமிழகம் இயக்கத்தின் கீழ் ₹6.45 லட்சம் மதிப்பீட்டில் மரக்கன்றுகள் உற்பத்தி செய்யப்பட்டு வருவதை மாவட்ட ஆட்சியர் ஆய்வு செய்தார். மரக்கன்றுகளின் வகைகள், உற்பத்தி முறை, பராமரிப்பு முறை, விற்பனை விவரம், மற்றும் மரக்கன்றுகளுக்கு இயற்கையான உரம் பயன்படுத்துதல் குறித்து கேட்டறிந்தார். இக்கரைத்தட்டுப்பள்ளி பகுதியில் தமிழ்நாடு நகர்ப்புற வாழ்விட மேம்பாட்டு வாரியம் சார்பில் ₹40.08 கோடி மதிப்பீட்டில் அடுக்குமாடி குடியிருப்புகள் கட்டப்பட்டு வருவதையும் அவர் ஆய்வு செய்தார். வட்டாட்சியர் அலுவலகம் மற்றும் ஆதார் சேவை மையம் ஆய்வு

முன்னதாக, பவானி வட்டாட்சியர் அலுவலகத்தில் ஆய்வு மேற்கொண்ட மாவட்ட ஆட்சியர், அங்கு செயல்பட்டு வரும் கிளைச் சிறையில் பராமரிக்கப்படும் பதிவேடுகள், உணவுக்கூடம், மற்றும் பாதுகாப்பு சாதனங்கள் குறித்து ஆய்வு செய்தார். அதனைத் தொடர்ந்து, ஆதார் சேவை மையத்திற்கு தினமும் வரும் பொதுமக்களின் எண்ணிக்கை குறித்தும் கேட்டறிந்தார். அப்பகுதியைச் சுத்தமாக வைத்துக்கொள்ளுமாறு பணியாளர்களுக்கு அறிவுறுத்தினார். இந்த ஆய்வுகளில் உதவி செயற்பொறியாளர்கள், பேரூராட்சி செயல் அலுவலர் திரு. மோஸ், புஞ்சை புளியம்பட்டி ஆணையாளர் திரு. கரணம்பால், புஞ்சை புளியம்பட்டி நகர மன்றத் தலைவர் திரு. ஜனார்த்தனன், சத்தியமங்கலம் வட்டாட்சியர் திருமதி. ஜமுனாதேவி, பவானிசாகர் வட்டார வளர்ச்சி அலுவலர்கள் உள்ளிட்ட துறை சார்ந்த அலுவலர்கள் கலந்து கொண்டனர்.